განვითრების დინამიკაში ვლინდება პაუზები და ნახტომები. არის პერიოდი, როცა ბავშვი ყოველდღიურად მეტ უნარს ავლენს. არის პერიოდები, როდესაც ახალი მიღწევები აღარ ვლინდება. ამ პერიოდში ხდება მანამდე დასწავლილი უნარების კონსოლიდირება და იწყება დაკვირვება -ახალი უნარ -ჩვევების შეძენის მიზნით.
მაგალითად, დაუნის სინდრომის მქონე ბავშვის შემთხვევაში ერთი მიღწევიდან მეორემდე შესაძლოა პაუზები მნიშვნელოვნად გაწელილი მოგვეჩვენოს, მაგრამ უნდა გვახსოვდეს, რომ ეს ‘უხილავი’ განვითარებაც განვითარებაა, რომელიც აისბერგივით ზედაპირზე არ ჩანს, მაგრამ შეიძლება უცებ ამოტივტივდეს.
დაბადებიდან ყოველწლიურად დაუნის სინდრომის მქონე ბავშვი ვითარდება ფიზიკურად, ინტელექტუალურად, ემოციურად, ხდება უფრო და უფრო კომპეტენტური და ივითარებს დამოუკიდებლობისთვის საჭირო უნარებს. თუმცა, ეს წინსვლის პროცესი განვითარების ასაკობრივ ნორმებთან მიმართებაში მნიშვნელოვნად ნელია. გარდა განვითარების დინამიკის შენელებისა, დაუნის სინდრომის შემთხვევაში, ეს პროცესი სრულყოფილი ვერ ხდება. ისინი სრული დამოუკიდებლობის ხარისხს ვერ აღწევენ, რაც გულისხმობს იმას, რომ ზრდასრულობაში, ყოველდღიურ ფუნქციონირებაში იმაზე მეტი დახმარება სჭირდებათ, ვიდრე ტიპური განვითარების პირებს.
ადამიანის განვითარებას აკონტროლებს ტვინი. დაუნის სინდრომის შემთხვევაში ტვინის ფუნქიონირება ტიპური შემთხვევისგან განსხვავებულია. ადეკვატური მიდგომით, სწავლებით და უნარჩვევების უზრუნველყოფით, შევძლებთ, დავეხმაროთ მათ არსებული პოტენციალის მაქსიამლურად რეალიზებაში.
განვითარების დინამიკის შენელების მიუხედავად, დაუნის სინდრომის მქონე პირებში გარდატეხის პერიოდი, ძირითადად, დგება იმავე ასაკში, როგორც ეს ტიპური განვითარების შემთხვევაშია.
გარეგნული ნიშნების ცვლილებამდე, ხდება ჰორმონალური ძვრები ორგანიზმში, რაც 2 წლით ადრე (11 წლისთვის) იწყება და ამ დროს ადგილი აქვს ბავშვის მოუსვენრობას, გადაღლილობის შეგრძნებას, გუნება- განწყობის ცვლილებას. გასათვალისწინებელია, რომ ფიზიკური განვითარება და ჰორმონალური ცვლილებები, მაშინ, როცა ბავშვი ემოციურად მოუმწიფებელია, ხოლო აბსტრაქტული აზროვნება განუვითარებელი, უფრო დამაბნეველი ხდება ბავშვისთვის და მეტ ძალისხმევას მოითხოვს უფროსისგან, არსებული მდგომარეობის გაგებისა და სექსუალური ქცევის რისკების სწავლების კუთხით.