შფოთვითი აშლილობების გამომწვევი მიზეზები არ არის სრულად შესწავლილი, თუმცა ექსპერტები მიიჩნევენ რომ ისინი უმეტეს შემთხვევაში არა რომელიმე ერთი, არამედ რამდენიმე სხვადასხვა ფაქტორის კომბინაციითაა განპირობებული. ქვემოთ მოცემულია იმ გავრცელებულ ფაქტორთა ჩამონათვალი, რომლებიც ზრდიან შფოთვითი აშლილობის ჩამოყალიბების რისკს:
- გენეტიკური ფაქტორები: მზარდი რაოდენობის ემპირიული მონაცემები მიუთითებს შფოთვითი აშლილობების ჩამოყალიბებაში გენეტიკური ფაქტორების როლზე. დადგენილია, რომ შფოთვითი აშლილობის დიაგნოზის მქონე ოჯახის წევრის არსებობა, ზრდის ამავე სირთულის განვითარების რისკს ადამიანისთვის.
- თანდაყოლილი ტემპერამენტი: ყველა ადამიანი გარკვეული ტემპერამენტით იბადება. ტემპერამენტი განსაზღვრავს იმას, თუ როგორ რეაგირებს იგი სამყაროსა და მის ირგვლივ მიმდინარე მოვლენებზე, როგორც ემოციური, ისე ქცევითი თვალსაზრისით. აღნიშნული რეაქციები მყარი, თანდაყოლილი და დაკვირვებადია დაბადებისთანავე და შეიძლება განპირობებული იყოს გენეტიკითაც. ტემპერამენტი წარმოადგენს ერთგვარ საძირკველს, რომლის საფუძველზეც მოგვიანებით ადამიანის პიროვნული ნიშნები ყალიბდება. ბავშვები, რომლებიც თავიანთი ტემპეტამენტიდან გამომდინარე, მიდრეკილნი არიან უარყოფითი ემოციებისკენ, სიფრთხილისკენ და როგორც წესი გაურბიან მათთვის ახალ, უცხო სიტუაციებსა და ადამიანებს, იმყოფებიან შფოთვითი აშლილობის ჩამოყალიბების შედარებით გაზრდილი რისკის ქვეშ.
- პიროვნული მახასიათებლები: გარკვეული ნიშან-თვისებები, მაგალითად მიდრეკილება ნეგატიური განცდებისკენ, ექსტრავერსია და ინტროვერსია- ასევე შეიძლება ზრდიდეს ან ამცირებდეს შფოთვითი აშლილობის ჩამოყალიბების რისკებს. მაგალითად, ზედმეტად თვითკრიტიკული დამოკიდებულება საკუთარი თავის მიმართ და პერფექციონიზმი ხშირად განაპირობებს შფოთვის მაღალი დონის არსებობას.
- სტრესული ცხოვრებისეული გამოცდილება: გადაჭარბებული ან დროში გახანგრძლივებული სტრესი ხშირად გავლენას ახდენს თავის ტვინის გარკვეული უბნების ფუნქციონირებაზე და შესაძლოა გახდეს ქრონიკული შფოთვის ჩამოყალიბების გამომწვევი მიზეზი.
- მედიკამენტები: შფოთვა შესაძლოა წარმოადგენდეს რომელიმე პრეპარატის მიღების გვერდით ეფექტს.