გენერალიზებული შფოთვითი აშლილობის შემთხვევაში, შფოთვა არა რომელიმე ერთ, არამედ სხვადასხვა სიტუაციებსა და მოვლენებს უკავშირდება. ამ აშლილობის მქონე ადამიანებისთვის დამახასიათებელია მუდმივი და გადაჭარბებული შფოთვა და ღელვა სხვადასხვა ცხოვრებისეულ მოვლენებთან დაკავშირებით.
გადაჭარბებული შფოთვა ართულებს ყოველდღიური აქტივობების განხორციელებას და დაკისრებული მოვალეობების შესრულებას, იწვევს პრობლემებს ურთიერთობებში, პროფესიულ საქმიანობასა და ცხოვრების სხვა მნიშვნელოვან სფეროებში. გარდა ამისა, აშლილობას თან ახლავს ისეთი ფიზიკური სიმპტომები, როგორებიცაა მოუსვენრობა, დაღლილობა, გაღიზიანებადობა, კუნთების დაჭიმულობა და ძილთან დაკავშირებული სირთულეები.
ფართო ასაკობრივი დიაპაზონიდან გამომდინარე, აშლილობის განვითარების საშუალო ასაკის განსაზღვრა სირთულეს წარმოადგენს. აშლილობის ძირითადი მახასიათებლები რამდენადმე უცვლელია ცხოვრების განმავლობაში, თუმცა განსხვავებულია ის საკითხები, რომლის შესახებაც შფოთავენ სხვადასხვა ასაკის მქონე ადამიანები. მაშინ როდესაც მოზრდილები ღელავენ ოჯახის წევრების კეთილდღეობასა და ფიზიკურ ჯანმრთელობაზე, ბავშვები და მოზარდები მეტად შფოთავენ სკოლასა და პირად მიღწევებზე. გარდა ამისა, გენერალიზებული შფოთვითი აშლილობის მქონე ბავშვები ხშირად ხასიათდებიან დამყოლობით, პერფექციონიზმით და გამოირჩევიან თავდაჯერებულობის დაბალი დონით - ისინი ზედმეტად თვითკრიტიკულები არიან, ცდილობენ ხელახლა და უნაკლოდ შეასრულონ ყველაფერი და მოიპოვონ დადებითი შეფასება გარშემომყოფების მხრიდან.