სოციალური შფოთვითი აშლილობა, იგივე სოციალური ფობია, ხასიათდება ისეთ სოციალურ სიტუაციებში აღმოჩენის უკიდურესი შიშით, სადაც ინდივიდი შეიძლება გახდეს დაკვირვების, უარყოფითი შეფასებისა და განსჯის ობიექტი. შესაბამისად, აშლილობის მქონე ადამიანები, თავს არიდებენ სოციალურ სიტუაციებს ან ასეთ სიტუაციებში მოხვედრისას, განიცდიან ძლიერ შფოთვას და ამჯობინებენ ჩრდილში ყოფნას.
აღნიშნული შფოთვითი აშლილობა შეიძლება დაიწყოს ადამიანის ცხოვრებაში მომხდარი რომელიმე სტრესული მოვლენის შემდგომ, რომელიც დაკავშირებულია დამცირებასა და შერცხვენასთან, რიგ შემთხვევებში კი შეიძლება განვითარდეს ეტაპობრივად, რაიმე კონკრეტული მოვლენის არსებობის გარეშე. აშლილობის განვითარების საშუალო ასაკი მერყეობს 8-დან 15 წლამდე, თუმცა შესაძლოა თავი იჩინოს უფრო ადრეულ ასაკშიც. ბავშვების შემთხვევაში, აღნიშნული დიაგნოზის აუცილებელი პირობაა, რომ შფოთვა ვლინდებოდეს არა მხოლოდ ზრდასრულებთან, არამედ თანატოლებთან ურთიერთობის პროცესშიც.