მრავალფეროვანი სენსორულ აქტივობები ხელს უწყობს და ახალისებს სხვადასხვა შეგრძნებითი არხის განვითარებას. პროცესში ბავშვი ბუნებრივად სწავლობს თუ როგო მიიღოს, გაფილტროს, გადაამუშავოს, მიღებული სტიმულები და შესაბამისად ჩაერთოს სასურველ აქტივობებში. ამისთვის კი ერთერთი საუკეთესო ადგილი არის ბუნებრივი გარემო.
ზოგადად, სენსორული აქტივობები ეფუძნება ბავშვის ინტერესებს, ხოლო ახალი აქტივობები შეთავაზებული უნდა იყოს სიფრთხილით და ეტაპობრივად. ეს ხელს შეუწყობს ახალი შეგრძნებითი გამოცდილებისადმი ბავშვის მიმღებლობის ნელნელა გაზრდას.
გთავაზობთ სხვადასხვა სენსორული არხის მასტიმულირებელ რამდენიმე აქტივობას სახლის პირობებში:
- პროპრიოცეპცია - ფიზიკური აქტივობები, რომელშიც ჩართული იქნება მთელი სხეული. მაგალითად ცხოველების მოძრაობების იმიტაცია, ცეკვა. ასევე, თამაშის დროს ფიზიკურად დატვირთვა. ვთქვათ გადაადგილოს მისთვის შედარებით მძიმე ნივთები - სკამი შეაცუროს მაგიდის ქვეშ, საკუთარი სათამაშოები ჩაალაგოს ყუთში, შეაგროვოს მიმოფანტული წიგნები, დადოს თაროზე დ ა.შ.
- ვესტიბულური შეგრძნება - აქტივობები, რომლებიც მოიცავს გადაადგილებასა და წონასწორობის შენარჩუნებას. მაგალითად საქანელაზე ქანაობა და პარალელურად ბურთების მიზანში სროლა, სენსორული ბილიკის გაკეთება სახლში ან ეზოში, რომელზეც ბავშვი გადაადგილდება გარკვეული წესების დაცვით. ვთქვათ სიარული და ხტუნვა იატაკზე მონიშნული ტერფების შაბლონების მიხედვით.
- შეხება - სხვადასხვა ტექსტურის მასალის შეთავაზება. მაგალითად ბანაობის დროს გამოიყენეთ განსხვავებული ფაქტურის ღრუბლები და პირსახოცები. ჩართეთ სამზარეულოს აქტივობებში - სთხოვეთ ბოსტნეულის და ხილის დალაგება ან გარეცხვა, ბურღულეულის ჩაყრა მისთვის განკუთვნილ კონტეინერში და ა.შ. ასევე, შესაძლებელია ბურღულეულის გამოყენება თამაშის პროცესში. მაგალითად ფქვილში დამალული მცირე ზომის სათამაშოების პოვნა.
- მხედველობა - აქტივობები, რომლებიც მოიცავს სხვადასხვა ვიზუალური სტიმულების გამოყენებას. მაგალითად ფერადი ქაფებით ხატვა სარკეზე, მანათობელი ყუთის დამზადება და მასზე სხვადასხვა აქტივობების დაგეგმვა, ვიზუალური ბოთლების დამზადება, სურვილისამებრ გაფორმება და სხვა.
- სმენა - სხვადასხვა ჟღერადობის, რიტმის და ტონალობის ხმების გამოყენება ფუნქციური აქტივობების დროს. მაგალითად ბავშვის ინტერესების გათვალისწინებით შესაძლებელია რიტმული მუსიკის ჩართვა ფიზიკური აქტივობების - ვთქვათ ბატუტზე ხტუნვის დროს. ასევე, პროდუქტების გამოყენებით ხმოვანი ბოთლების დამზადება, მისი მუსიკალური დანიშნულებით გამოყენება და სხვა.
- ყნოსვა/გემო - წაახალისეთ სამზარეულო აქტივობებში ბავშვის ჩართულობა და საკვებით თამაში. მაგალითად დახატეთ სხვადასხვა პროდუქტებით. ვთქვათ ქაღალდის თეფშზე სახე მოხატეთ იოგურტით, სპაგეტით გაუკეთეთ თმები, ბოსტნეულით პირი და ა.შ. ასევე, ააშენეთ სახლები ბისკვიტების საშუალებით და გააფორმეთ სხვა საკვები პროდუქტებით.