სმენის აღდგენის პროგნოზი დამოკიდებულია დაზიანების გამომწვევ მიზეზზე. სმენის გამტარობით ანუ კონდუქტიურ დაქვეითებას, რაც უკავშირდება ყურის გარეთა ან შუა ნაწილს, აქვს გაუმჯობესების ყველაზე მაღალი პოტენციალი. მაგალითად, ბავშვს, რომელსაც ხშირად აღენიშნება ოტიტით გამოწვეული ყურის ინფექცია, სმენა სრულად შეიძლება აღუდგეს მას შემდეგ, რაც პატარა მილები ქირურგიული ჩარევით ჩაიდგმება ყურში წნევის შესამსუბუქებლად და სითხის უკეთ გადინების ხელშესაწყობად. ყურში გოგირდის გადაჭარბებული დაგროვება, ჩვეულებრივ, საკმაოდ მარტივად შეიძლება იქნას მოგვარებული სპეციალისტის მიერ, რაც იწვევს სმენის თითქმის მყისიერ გაუმჯობესებას. თუმცა, უნდა აღინიშნოს, რომ სენსონევრალური სმენის დარღვევების უმეტესობა მუდმივია.
რაც შეეხება სმენის დაზიანების შედეგებს ბავშვის კომუნიკაციის, ენისა და მეტყველების განვითარებაზე, აღნიშნული დამოკიდებულია ისეთ ფაქტორებზე, როგორიცაა: სმენის დაზიანების სიმწვავე, სმენის დაზიანების მიზეზი, სმენის დაზიანების ლოკაცია აუდიტორულ სისტემაში, დაზიანების ასაკი (პრე თუ პოსტ ლინგვური დაზიანება), სმენის დაზიანების დადგენის პერიოდი (რამდენად დროულად მოხდა დიაგნოსტირება), სმენის დაზიანების დიაგნოსტირების შემდგომი ინტერვენცია (რამდენად დროულად და სათანადოდ წარიმართა), ბავშვის მიერ გამოყენებული სმენის აპარატის შესაბამისობა მის სმენით საჭიროებებთან და გამოყენების რეგულარობა, ოჯახში გამოყენებული მიდგომები და ენა და სხვ.