კვების რუტინის ჩამოყალიბება
მნიშვნელოვანია გარკვეული რუტინის ჩამოყალიბება კვებისას. შესაბამისად სასურველია, რომ ბავშვი იკვებებოდეს დაახლოებით ერთსა და იმავე დროს დღის განმავლობაში. ზოგჯერ ბავშვს საშუალება აქვს დამატებით მიიღოს სითხე / წვენი ან ცოტა წაიხემსოს, რაც მას ანიჭებს დანაყრების შეგრძნებას და, ხდება მიზეზი, იმისა, რომ ბავშვი უარს ამბობს ძირითადი საკვების მიღებაზე.
სწორი პოზის ხელშეწყობა კვებისას
წარმატებული კვებისთვის საჭიროა მოძრაობების ძალდაუტანებლად განხორციელება და მრავალი კუნთის შეთანხმებულად მოქმედება. კვებისას, სხეულის სტაბილურ და უსაფრთხო მდგომარეობაში შენარჩუნება, ეხმარება ბავშვს უკეთ მოახდინოს პროცესზე ფოკუსირება და არ გადაიტანოს ყურადღება თავდაცვით რეაქციებზე, მაგალითად, როგორიცაა ბალანსის შენარჩუნების მცდელობა. შესაბამისად, რეკომენდებულია ფუნქციური ჯდომა, რომლის დროსაც, მენჯ-ბარძაყის, მუხლის და კოჭწვივს სახსარი მოხრილია დაახლოებით 90 გრადუსიანი კუთხით.
ჩვილის კვების პროცესში ოპტიმალურ პოზად მიჩნეულია ოდნავ აღმართული პოზა, რაც იცავს ბავშვს გადაცდენის რისკისაგან. მნიშვნელოვანია, ბავშვი მიყრდნობილი იყოს მზრუნველი პირის სხეულს, კვებისას მისი ზურგის და კისრის სიმეტრიული მდგომარეობის უზრუნველსაყოფად.
დამოუკიდებლად კვების ხელშეწყობა
კვების პროცესში მნიშვნელოვანია შეძლებისდაგვარად მოხდეს ბავშვის არსებული უნარების წახალისება. ამისათვის გამოიყენეთ სხვადასახვა სახალისო ჭურჭელი, რომელიც კომფორტული და საინტერესო იქნება ბავშვისათვის.
საჭიროების შემთხევაში დაეხმარეთ მინიმალურად. გამოიყენეთ ხელით ხელზე მეთოდი - მოკიდეთ ხელზე ხელი და ერთობლივად განახორციელეთ მოქმედებები. ეტაპობრივად შეამცირეთ თქვენი დახმარება. მნიშვნელოვანია დახმარების დონის სწორად განსაზღვრა, არ გადააჭარბოთ, მიეცით საშუალება თავად სცადოს დამოუკიდებლად კვება.