არსებობს სხვადასხვა დამხმარე საშუალება, რომელთა გამოყენებაც ბევრად უფრო ამარტივებს კვების პროცესს და ხელს უწყობს ბავშვის დამოუკიდებლობას. მაგალითად: ადაპტირებული სკამი, მაგიდა, ჭურჭელი.
დამხმარე საშუალებები ჯდომისთვის:
- 3 წლამდე ბავშვისთვის დამხმარეა კვებისთვის განკუთვნილი სკამი, რომელსაც წინ დამაგრებული აქვს მაგიდა, ან ლანგარი და უზრუნველყოფს სწორ ფუნქციურ პოზას ჯდომის დროს.
- თუ ბავშვის ფიზიკური მდგომარეობიდან ან სკამის ზომებიდან გამომდინარე, ვერ ხერხდება სხეულის სწორ პოზაში შენარჩუნება - სკამის სიღრმის, სიმაღლის თუ სატერფულის ზომის შესავსებად შესაძლებელია ღრუბლის, ან რამდენიმე ნაწილად გადაკეცილი პირსახოცის გამოყენება.
- გარდა სტაბილურობის შენარჩუნებისა, სპეციალურად შერჩეული სკამი ამავდროულად მოსახერხებელია ოჯახთან ერთად კვების პროცესში. ბავშვი ზის კომფორტულად, სათანადო სიმაღლეზე და ეძლევა ოჯახის წევრთან ინტერაქციის შესაძლებლობა.
ადაპტირებული ჭურჭელი:
- როდესაც ბავშვი იწყებს კოვზის გამოყენებას, პირველ ეტაპზე უმჯობესია შედარებით სქელი, მოკლე ტარიანი კოვზის შეთავაზება. ეს უფრო მეტად გაუადვილებს ბავშვს მასზე ჩაჭიდებას.
- ნერვ-კუნთოვანი დაავადებების დროს, როდესაც ბავშვს უჭირს სტანდარტული კოვზის/ ჩანგლის გამოყენება, შესთავაზეთ მოხრილი კოვზი, რომლის დახმარებით საკვების პირთან მიტანისას ბავშვს დასჭირდება მაჯის ნაკლები მოძრაობა. კოვზისა და ჩანგლის შერჩევისას გაითვალისწინეთ ბავშვის დომინანტური ხელი (მემარჯვენე/მემარცხენე).
- ზოგ შემთხვევაში, მიზანშეწონილია ისეთი კოვზის/ჩანგლის გამოყენება, რომელიც ხელზე მაგრდება სპეციალური სამაგრით, ან ღვედით.
- როდესაც ბავშვს უჭირს პირის დახურვა და ტუჩების ერთმანეთთან მიახლოვება - რეკომენდებულია ნაკლებად ღრმა კოვზის გამოყენება.
- თუ ბავშვს სჭირდება დამატებითი სტიმულების მიღება საკვების პირის ღრუში აღქმისა და კონტროლისათვის - რეკომენდებულია სხვადასხვა ტექსტურის თუ ზედაპირის კოვზის შეთავაზება.
- თუ ბავშვი კვების დროს კბენს კოვზს/ ჩანგალს, უმჯობესია გამოიყენოთ რეზინის ან სილიკონის საფარველიანი კოვზი/ ჩანგალი, რათა კვებისას არ დაზიანდეს კბილის ემალი.
- თუ კვების პროცესში რთულდება თეფშის მაგიდაზე ფიქსაცია - გამოიყენეთ თეფში სილიკონის ძირით, რომელიც მყარად ეკვრის მაგიდის ზედაპირს. ეს შეამცირებს თეფშის გადმოვარდნისა და საკვების დაღვრის რისკებს.
- წყლის ან სხვა სითხის დალევის დროს გამოიყენეთ შესაფერისი ზომის ჭიქა, რომლის ხელში დაჭერასაც ბავშვი უფრო უკეთ შეძლებს. ფართო ძირიანი ან თავსახურიანი ჭიქები ამცირებს სითხის დაღვრის ალბათობას მაშინ, როდესაც ბავშვი ჭიქას მაგიდაზე დებს.
- ჭიქიდან სითხის დამოუკიდებლად დალევის პირველი მცდელობებისას, უმჯობესია მასში არ ესხას 10 მლ სითხეზე მეტი. ასე უფრო მეტად ხდება სითხის კონტროლი და გადაცდენის რისკის თავიდან არიდება.
- თუ ფიზიკური სირთულეების გამო ბავშვს უჭირს ორი ხელის შეთანხმებულად გამოყენება - საწრუპი მილი დაამაგრეთ ჭიქაზე ისე, რომ არ იმოძრაოს. ასე ბავშვს აღარ დასჭირდება ერთი ხელით საწრუპის დაფიქსირება და შეძლებს ორივე ხელით აკონტროლოს ჭიქა/ ბოთლი.